మ‌హ‌నీయుల బాట‌లో ప‌య‌నిద్దాం… భావిత‌రాల‌కు స్ఫూర్తిగా నిలుద్దాం…

ఉత్సాహంగా పాల్గొన్న యువ‌త‌, అధికారులు, వివిధ సంస్థ‌ల ప్ర‌తినిధులు, సేవ‌కులు
హ‌ర్ ఘ‌ర్ తిరంఘ ర్యాలీలో పిలుపునిచ్చిన జిల్లా క‌లెక్ట‌ర్ విజయ క్రిష్ణన్
అనకాపల్లి, ఆగ‌స్టు 14: దేశం కోసం అహ‌ర్నిశ‌లూ శ్ర‌మించి, స్వాతంత్ర్య సాధ‌న కోసం ఎన్నో త్యాగాలు చేసిన మ‌హ‌నీయుల సేవ‌ల‌ను స్మ‌రించుకుంటూ వారి బాట‌లో పయనిద్దామ‌ని, వారిలాగే భావిత‌రాల‌కు స్ఫూర్తిగా నిలుద్దామ‌ని జిల్లా క‌లెక్ట‌ర్ విజయ క్రిష్ణన్ పిలుపునిచ్చారు. ఈ నెల 2వ తేదీ నుంచి జ‌రుగుతున్న హ‌ర్ ఘ‌ర్ తిరంగా ప్ర‌త్యేక‌ కార్య‌క్ర‌మాలలో భాగంగా బుధవారం ఉద‌యం స్థానిక ఎన్టీఆర్ స్టేడియం నుంచి నెహ్రూ చౌక్ మీదుగా తిరిగి ఎన్టీఆర్ స్టేడియం వరకు హ‌ర్ ఘ‌ర్ తిరంగా ర్యాలీ నిర్వహించారు. జిల్లాలోని వివిధ శాఖల అధికారులు, స్వ‌చ్ఛంద సంస్థ‌ల ప్ర‌తినిధులు, సామాజిక కార్య‌క‌ర్తలు, క్రీడాకారులు, విద్యార్థులు ఉత్సాహంగా పాల్గొన్నారు. భార‌త్ మాతాకీ జై… హ‌ర్ ఘ‌ర్ తిరంగా అంటూ నిన‌దిస్తూ మువ్వెన్న‌ల జెండా చేత బ‌ట్టి ముందుకు సాగారు. వీక్ష‌కుల్లో జాతీయ భావాన్ని, స్ఫూర్తిని నింపే ప్ర‌య‌త్నం చేశారు.హ‌ర్ ఘ‌ర్ తిరంగా కార్యక్రమాల్లో భాగంగా బుధవారం ఉదయం  జిల్లా క‌లెక్ట‌ర్ విజయ క్రిష్ణన్ , అడిషనల్ సూపరింటెండెంట్ ఆఫ్ పోలీస్ కె. విజయభాస్కర్ ముఖ్య అతిథులుగా పాల్గొని జెండా ఊపి హ‌ర్ ఘ‌ర్ తిరంగా ర్యాలీ ను ప్రారంభించారు. ఈ క్ర‌మంలో రెవిన్యూ డివిజనల్ అధికారి చిన్ని కృష్ణ, డి.ఎఫ్.ఓ.లక్ష్మణరావు, జిల్లా విద్యాశాఖ అధికారి వెంకట లక్ష్మమ్మ, డి.ఎస్.డబ్ల్యూ.ఎస్. అధికారి మంజులవాణి , ఇతర జిల్లా అధికారులు ర్యాలీగా సాగారు. అనంత‌రం నాలుగు రోడ్ల జంక్షన్ వద్ద మానవహారంగా ఏర్పడి, ప్ర‌తిజ్ఞ చేసి విద్యార్థులు, అధికారులు, క్రీడాకారుల‌తో క‌లిసి తిరిగి ఎన్టీఆర్ స్టేడి వరకు ర్యాలీ కొనసాగింది.ఈ సంద‌ర్భంగా అక్క‌డ‌కు విచ్చేసిన వారిని ఉద్దేశించి క‌లెక్ట‌ర్ మాట్లాడుతూ  దేశానికి స్వాతంత్ర్యం తీసుకురావ‌టంలో  స్వాతంత్ర్య స‌మ‌ర యోధులు ఎంతో కృషి చేశార‌ని, ఎన్నో త్యాగాల‌ను చేశార‌ని గుర్తు చేశారు. వారి త్యాగాల‌ను, సాహ‌సాల‌ను స్ఫూర్తిగా తీసుకొని ముందుకు సాగాల్సిన ఆవ‌శ్య‌క‌త ఉంద‌ని పేర్కొన్నారు. వారి బాట‌లో ప‌య‌నించి యువ‌త ఎద‌గాల‌ని ఆకాంక్షించారు. దేశ ప్ర‌యోజ‌నాలు, సమాజ హితం కోసం అంకిత‌భావంతో ప‌ని చేయాల‌ని సూచించారు.